編輯話想寫日圓走勢，著實我都冇水晶球。如果我真係極有信心嘅話，肯定發達。預測，都係估估下啫。不過可以分享我真心嘅預測（雖然未必啱）：我相信未來一兩年，日圓升嘅機會應該大過跌。而另一方面，我亦都身體力行，呢排都開始成日自己去櫃員機唱yen。

近期日本嘅情況，都係人工加埋都追唔上通脹，變相實質工資一路跌。 · koumaru via Getty Images

現實就係 日本央行一路加息

著實匯率呢啲東西，極之難估。你叫我估股市我都仲有些少信心，但估匯率真係極難。近期日圓再弱勢，好多人都認為同首相高市早苗有關。特別係近期佢宣佈解散眾議院，提前大選。

高市早苗之前發表嘅言論，令中日關係惡速惡化。但在日本國內，佢民望暫時相當高。正路嘅講法，係佢希望趁民望高嗰時快手選舉，掃除障礙，就可以實施佢心中嘅政策。

大家都聽過，高市早苗向來以「安倍晉三承繼人」自居，佢嘅經濟政策，似乎亦係想延續「安倍經濟學」嘅「三支箭」。不過都有唔少人提到，佢想達到嘅目標，似乎有啲矛盾。一方面佢希望加大政府開支（但錢何來？），佢亦似乎希望見到日圓走弱。但另一方面佢又希望改善實質工資，而近期日本嘅情況，都係人工加埋都追唔上通脹，變相實質工資一路跌。

現實就係，日本央行一路加息，好可能4月又會加。要記住嘅係，匯率係相對嘅概念。另一方面，美國就一路在減息。在日本加息而美國減息嘅情況下，日圓仲係咪有好大下跌空間？我就有啲疑問。

好多人知道，日本大量倚賴進口能源同埋糧食。在日圓大幅貶值嘅情況下，似乎通脹會一路升。兩三個月內，當然未必好大問題。但到一年半載，恐怕高通脹就會成為日本選民最關心嘅議題。畢竟太平盛世，大家最關心都係物價。特朗普二次入主白宮，唔多唔少因為拜登任期尾段物價大升。而家就風水輪流轉，到民主黨攻擊物價飛升。

日本嘅情況仲特別，唔少老人經歷咗之前零通脹甚至通縮嘅年代，忽然見到物價飛升，衝擊應該幾大，而日本亦出名係老人政治，皆因少子化，根本年輕人口就唔多，往住政府就係要討好老人家。

再講一次，年尾到底日圓平過而家定貴過而家，我真係估唔到，估到就發達。不過幾時都係身體最誠實，我呢排都係密密換日圓，唔會再等遲啲。就算我錯都好，至少都係言行一致。

李聲揚

前大行分析員，如今無業遊民，別人恐懼時我貪婪

FB Page︰meatbonetea金融肉骨茶

原報導連結：https://hk.finance.yahoo.com/news/%E5%A4%A7%E5%B8%AB%E5%86%87%E9%BB%9E%E4%BD%A0%E2%94%82%E6%9C%AA%E4%BE%86%E4%B8%80%E5%85%A9%E5%B9%B4-%E6%97%A5%E5%9C%93%E5%8D%87%E5%A4%9A%E9%81%8E%E8%B7%8C%EF%BC%88%E6%9D%8E%E8%81%B2%E6%8F%9A%EF%BC%89-003003877.html