编辑话想写日圆走势，着实我都冇水晶球。如果我真系极有信心嘅话，肯定发达。预测，都系估估下啫。不过可以分享我真心嘅预测（虽然未必啱）：我相信未来一两年，日圆升嘅机会应该大过跌。而另一方面，我亦都身体力行，呢排都开始成日自己去柜员机唱yen。

着实汇率呢啲东西，极之难估。你叫我估股市我都仲有些少信心，但估汇率真系极难。近期日圆再弱势，好多人都认为同首相高市早苗有关。特别系近期佢宣布解散众议院，提前大选。

高市早苗之前发表嘅言论，令中日关系恶速恶化。但在日本国内，佢民望暂时相当高。正路嘅讲法，系佢希望趁民望高嗰时快手选举，扫除障碍，就可以实施佢心中嘅政策。

大家都听过，高市早苗向来以“安倍晋三承继人”自居，佢嘅经济政策，似乎亦系想延续“安倍经济学”嘅“三支箭”。不过都有唔少人提到，佢想达到嘅目标，似乎有啲矛盾。一方面佢希望加大政府开支（但钱何来？），佢亦似乎希望见到日圆走弱。但另一方面佢又希望改善实质工资，而近期日本嘅情况，都系人工加埋都追唔上通胀，变相实质工资一路跌。

现实就系，日本央行一路加息，好可能4月又会加。要记住嘅系，汇率系相对嘅概念。另一方面，美国就一路在减息。在日本加息而美国减息嘅情况下，日圆仲系咪有好大下跌空间？我就有啲疑问。

好多人知道，日本大量倚赖进口能源同埋粮食。在日圆大幅贬值嘅情况下，似乎通胀会一路升。两三个月内，当然未必好大问题。但到一年半载，恐怕高通胀就会成为日本选民最关心嘅议题。毕竟太平盛世，大家最关心都系物价。特朗普二次入主白宫，唔多唔少因为拜登任期尾段物价大升。而家就风水轮流转，到民主党攻击物价飞升。

日本嘅情况仲特别，唔少老人经历咗之前零通胀甚至通缩嘅年代，忽然见到物价飞升，冲击应该几大，而日本亦出名系老人政治，皆因少子化，根本年轻人口就唔多，往住政府就系要讨好老人家。

再讲一次，年尾到底日圆平过而家定贵过而家，我真系估唔到，估到就发达。不过几时都系身体最诚实，我呢排都系密密换日圆，唔会再等迟啲。就算我错都好，至少都系言行一致。

李声扬

前大行分析员，如今无业游民，别人恐惧时我贪婪

FB Page︰meatbonetea金融肉骨茶