金黃色炸方包夾住香甜爆餡嘅忌廉，材料睇落冇太多花巧，但就成為福岡一間主題店嘅爆紅美食，亦係遊日必食item之一！品牌近日登港，即睇佢有咩吸引之處～

即叫即炸+爆餡忌廉

香港店引入約30款口味，除咗有多款經典鹹甜口味，好似人氣士多啤梨、香蕉朱古力、蜜柑、紅豆牛油等，仲有香港先食到嘅獨家口味：芒果杏仁豆腐。每款都係即叫即製，先將方包每面以高溫油炸約40秒，然後切成三角形，再按唔同口味塞滿忌廉同配料。雖然用料簡單，但係香脆口感搭配輕盈creamy嘅忌廉，層次好豐富！

香港限定芒果杏仁豆腐口味，係喺原味嘅基礎上，加上杏仁豆腐凍，再淋上酸酸甜甜嘅芒果醬，配以杞子作點綴，又真係幾有港式味道～

經典口味：開心果 / 生朱古力 / 半熟蛋炒麵

開心果同生朱古力系列都係受歡迎之選，前者表面鋪滿開心果碎碎同莓果醬，開心果味主要靠果仁本身嘅香氣，唔算濃郁，但配上酸甜莓醬又幾夾；後者有朱古力同抹茶味，加入半融口感嘅生朱古力粒增添口感，味道濃厚，啱晒朱古力迷啊～

焦糖燉蛋同半熟蛋炒麵都充滿特色，焦糖燉蛋以吉士忌廉作基底，灑糖後炙燒形成焦糖脆面，不過比較快溶，打卡要快手啲。而10款富日式元素嘅鹹味選擇，開飯仔推介半熟蛋炒麵，鹹鹹香香幾惹味，仲好有日漫氛圍。

Age.3
地址: 旺角太子道西193號MOKO新世紀廣場MTR樓M41號舖
文：Sharon
編：Cathy
相、片：Tom
剪：Tony

https://hk.news.yahoo.com/%E7%A6%8F%E5%B2%A1-%E7%82%B8%E4%B8%89%E6%96%87%E6%B2%BB-%E9%A6%99%E6%B8%AF%E9%99%90%E5%AE%9A-013049473.html